पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
दाङ : बालबालिका तथा महिलाको स्वास्थ्य र कल्याणका लागि थारु समुदायमा प्रचलित परम्परागत लौठसारी पूजा सुरु भएको छ । वर्षमा दुई पटक मनाइने यो पूजा थारु समुदायको महत्वपूर्ण सांस्कृतिक तथा धार्मिक आस्थासँग जोडिएको विधि मानिन्छ ।
हरेक वर्ष कार्तिक–मंसिर र चैत–वैशाखमा लौठसारी पूजा गर्ने चलन रहेको तुलसीपुर उपमहानगरपालिका –११ उरहरीका मटावाँ तथा देशबन्ध्या गुर्वा पूर्णबहादुर चौधरीले बताए । “थारु समुदायमा यो पूजा अनिवार्यजस्तै मानिन्छ” उनले भने, “वर्षमा दुई पटक देशबन्ध्या गुर्वा वा घरगुर्वाले पूजा गरिदिन्छन् उनले भने । लौठसारी पूजा गरेपछि घरको बालबालिका तथा महिलाको स्वास्थ्य राम्रो हुने, रोगव्याधि घट्ने र पारिवारिक सुख–समृद्धि आउने जनविश्वास छ ।
पछिल्लो समय गैरथारु परिवारले पनि लौठसारी पूजा गराउने बढिरहेको उनले बताए । “म अहिले करिब ४५० घरमा लौठसारी पूजा गर्छु” उनले भने, “तीमध्ये करिब एक सय वटा पहाडी समुदायका घर छन ।” दाङ, बाँके र बर्दियाका विभिन्न ठाउँबाट उहाँलाई पूजा गर्न बोलाउने गरिन्छ । पूजा गरेबापत सेवा शुल्क तय गरिएको छैन ।
स्वच्छाले कोही पाँचसय दिनुहुन्छ, कोही एक हजार, उनले भने । उनी शिक्षण पेशा छाडेर पूर्णरूपमा पूजापाठ र धर्मकर्ममा लागेका छन् । “संस्कृतिको संरक्षण गर्दै काम गर्दा ठूलो सन्तुष्टि मिल्छ” उनको भनाइ छ । उनले करिब ४२ वर्षदेखि थारु संस्कारअनुसारका पूजापाठ गर्दै आएका छन् ।
यसैगरी, दंगीशरण –३ हेकुलीका गुर्वा खुशीराम चौधरी पनि अहिले लौठसारी पूजामा अत्यन्त व्यस्त छन् । आफ्नै गाउँदेखि छिमेकी गाउँ र पालिकासम्म पुगेर उनले पूजा गरिदिन्छन् । “पहिला टाढाका गाउँसम्म पनि जान्थेँ, अब उमेर लागेपछि धेरै टाढा जान छाडेको छु, कोही गाडी लिएर आउनुभयो भने त्यहाँ पनि गइदिन्छु, खुशीरामले भने, “३५–३६ वर्षदेखि निरन्तर गुरैपाटी गर्दैआएको छुँ ।”
