बाँकेमा एक जना फरार प्रतिवादी ३२ वर्षपछि पक्राउ

नेपालगञ्ज : दुई वर्ष जेल सजाय पाएर फरार भएका प्रतिवादी ३२ वर्षपछि बाँकेको नेपालगञ्जबाट पक्राउ परेका छन् । 

नेपालगञ्ज–२० मनिकापुरका ६२ वर्षीय सन्तोष अहिर पक्राउ परेको जिल्ला प्रहरी कार्यालय बाँकेले जनाएको छ । जिल्ला अदालत बाँकेले २०४९ बैशाख १८ गते अहिरलाई कर्तव्य ज्यान मुद्दामा दोषी ठहर गर्दै २ वर्ष जेल सजाय सुनाएको थियो ।

जेल सजाय पाएलगत्तै फरार भएका अहिरलाई नेपालगञ्ज आएको अवस्थामा जिल्ला प्रहरी कार्यालय बाँकेबाट खटिएको टोलीले पक्राउ गरेको हो ।

पक्राउ परेका अहिरलाई जेल सजाय भुक्तानका लागि जिल्ला अदालत हुँदै जिल्ला कारागार बाँके पठाइएको जिल्ला प्रहरी कार्यालय बाँकेले जनाएको छ ।