पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
बर्दिया : जिल्ला अदालत बर्दियाले गत भदौ २४ को प्रदर्शनका क्रममा आगजनी, तोडफोड र लुटपाट गरेको आरोपमा दुई जनालाई पुर्पक्षका लागि कारागार चलान गरेको छ ।
उक्त घटनामा संलग्न भएको आरोपमा पाँच जनालाई धरौटी लिई तारेखमा छाडेको अदालतले जनाएको छ ।
एमाले, कांग्रेसको पार्टी कार्यालय, गुलरिया नगरपालिकाको कार्यालय र पूर्वमन्त्री सञ्जय गौतमको घर तोडफोड, लुटपाट र आगजनीको आरोपमा प्रहरीले २ जनासहित सातजना विरुद्ध आपराधिक तथा आपराधिक उपद्रवसम्बन्धी कसुर मुद्दा दायर गरेको थियो ।
जिल्ला अदालतले गुलरिया–४ का रोनक पोरवार भन्ने रोनक गुप्ता र गुलरिया–७ का अशरद पठानलाई पुर्पक्षका लागि कारागार पठाएको श्रेस्तेदार कमल घलेले बताए । जिल्ला न्यायाधीश मनोज श्रेष्ठको एकल इजलासले सोही मुद्दामा गुलरिया–११ का सलिम गद्दीलाई ६० हजार धरौटी लिई तारेखमा छाडिएको उनले जनाए ।
गुलरिया–६ का इरफान मनिहारलाई १ लाख २५ हजार, सोही ठाउँका नदिम शेष मन्सुरलाई ५० हजार, मोहम्मद जैद शेषलाई ५० हजार र राजु कुरेशीलाई १ लाख रुपैयाँ धरौटी लिई तारेखमा छाडेको श्रेस्तेदार घल्ले जनाए । उक्त घटनामा संलग्न १६ जनाविरुद्ध मुद्दा दायर गरिएको प्रहरीले जनाएको छ । थप ९ जना अझै फरार छन् ।
