कुखुरा फर्ममा आगलागी, ५७ सय कुखुरा जलेर नष्ट

पश्चिम नवलपरासी : बर्दघाटमा कुखुरा फर्ममा आगलागी हुँदा पाँच हजार सात सय कुखुरा जलेर नष्ट भएको छ । बर्दघाट नगरपालिका वडा नम्बर १४ गंगाबस्तीमा रहेको अन्नपूर्ण पोल्ट्री फर्ममा बुधबार राति आगलागी भएको हो ।

आगलागीबाट कुखुरा चल्ला ४५ सय र बिक्री गर्ने तयारीमा रहेका कुखुरा १२ सय गरी ५७ सय कुखुरा जलेर नष्ट भएको जिल्ला प्रहरी कार्यालय नवलपरासीका सूचना अधिकारी विरदत्त पन्तले जानकारी दिए । आगलागीबाट दस लाख बराबरको क्षति भएको अनुमान गरिएको छ ।

आगो बर्दघाट नगरपालिकाको दमकल, प्रहरी र स्थानीयको सहयोगमा नियन्त्रणमा लिइएको थियो । विद्युत सर्ट भएर आगो लागेको हुन सक्ने फर्म सञ्चालक ईमामुद्दिन अन्सारीले बताए ।