पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
नेपालगञ्ज : जेनजी आन्दोलनका क्रममा नापी कार्यालय बाँकेमा भएको तोडफोड र आगलागीका कारण रोकिएको नापी सेवा पुनः शुरु भएको छ । लामो समयदेखि सेवा अवरुद्ध हुँदा समस्यामा परेका सर्वसाधारणले अब आफ्नो काम अघि बढाउन पाउने भएपछि राहत महसुस गरेका छन् ।
आन्दोलनका क्रममा कार्यालय भवनदेखि लिएर धेरै महत्वपूर्ण प्राविधिक अभिलेख तथा कागजात जलेर नष्ट भएका थिए । यही कारण केही सेवा तत्क्षण सञ्चालन गर्न नसकिने कार्यालयले जनाएको छ । तथापि, जनतासँग प्रत्यक्ष सम्बन्धित सेवा प्राथमिकताका साथ सुचारु गर्न प्रयास भइरहेको बताइएको छ ।
कार्यालयका निमित्त प्रमुख राजेन्द्र थापाका अनुसार डिजिटल प्रणालीमा सुरक्षित रहेका अभिलेखका आधारमा अधिकांश सेवा सहजरूपमा सञ्चालन हुनेछन् । तर दुवै प्रणालीमा दर्ता नभएका पुराना कागजातसँग सम्बन्धित सेवामा केही समय लाग्ने उनले बताए ।
“हामी क्षतिबाट बिस्तारै उठ्दैछौं । जनताको काम रोकिन नदिई सकेसम्म चाँडो सेवा सामान्य बनाउने प्रयास गर्दैछौं,” थापाले भने ।
नापी सेवा—जस्तै बारी–खेत नाप, जग्गा नाप, नामसारी, कित्ताकाटका लागि दैनिक कार्यालय धाइरहेका सेवाग्राहीका लागि ‘कार्यालय फेरि खुलेको’ सूचना नै ठूलो राहत बनेको छ । आन्दोलनका बीच कागजात जलेको देखेर आफ्नो काम कहिले अघि बढ्ला भन्ने चिन्तामा रहेका धेरै नागरिक अहिले ढुक्क भएका छन् ।
कार्यालयले सेवाग्राहीलाई आवश्यक कागजातसहित तोकिएको मितिदेखि सेवा लिन उपस्थित हुन आग्रह गरेको छ । साथै, जलेका अभिलेख पुनः तयार गर्ने, डेटा पुनः संरचना गर्ने र भवन मर्मतसँगै सेवा पूर्णरूपमा पहिलेकै गतिमा ल्याउने प्रयास जारी रहेको पनि जनाएको छ ।
