१४ बर्षीया कामना बनिन् कर्णाली प्रदेशको सामाजिक विकास मन्त्री

नेपालगञ्ज : लैंगिक हिंसा विरुद्धको १६ दिने अभियानको पहिलो दिन, अन्तर्राष्ट्रिय महिला हिंसा अन्त्य दिवसको अवसरमा कालिकोटकी १४ वर्षीया कामनाले कर्णाली प्रदेश, सामाजिक विकास मन्त्रालयका मन्त्रीे घनश्याम भण्डारीको भूमिका निर्वाह गरेकी छन् । 

बालबालिकाको अधिकार प्रबर्धन, बालिका र किशोरीको समानता र सशक्तिकरणका लागि क्रियासिल संस्था प्लान इन्टरनेशनलले सञ्चालन गरेको गल्र्स टेक ओभर अभियान अन्तर्गत कामनाले मन्त्रीको भूमिका निर्वाह गरेकी हुन् । 

उक्त अवसरमा किशोरी मन्त्रीले बालबालिका र किशोरीहरु माथिहुने सबै खालको हिंसाको अन्त्य हुनुपर्ने माग गरिन् । मन्त्रि बनेपछि उनले कर्णाली प्रदेश सरकार सामाजिक विकास मन्त्रालयको काम र योजनाबारे जानकारी लिइन् । 

शिक्षा, स्वास्थ्य र सामाजिक विकास महाशाखाका प्रमुखहरुले मन्त्रालयद्वारा भए गरेका कामहरु र आगामी योजनाबारे जानकारी दिएका थिए भने कामनाले कर्णालीको बालबालिका र किशोरीहरुको स्वास्थ्य, शिक्षा र सशक्तिकरणका लागि थप सुधार र विकासको माग राखेकी थिइन् । 

कार्यक्रम बारे बोल्दै कर्णाली प्रदेश, सामाजिक विकास मन्त्रि घनश्याम भण्डारीले सबै किशोरकिशोरी र युवाहरु नेपालको भविष्य भएकोले यो कार्यक्रमले तिनै किशोरकिशोरी र युवाहरुको सशक्तिकरणसंगै, भविष्य र सम्भावना पनी नेपालमै खोज्नका लागि सकारात्मक संदेश दिएको बताए । 

त्यसैगरी उनले लैंगिक हिंसा बिरुद्धको दिवसको शुभारम्भाको दिनमा कालीकोटकी एक किशोरी मन्त्री पदमा बसेर कर्णालीको बाबालिकाको समस्या र मागहरुमाथि थप ध्यानाकर्षण गराएकोमा धन्यवाद दिए । 

सो अवसरमा सामाजिक विकास मन्त्रालयका सचिवले आफ्नो सफल जिवन यात्राबारे अनुभव बाँड्दै किशोरी मन्त्रीलाई बधाई दिए । यस्तो खालको अभियान कर्णालीका बालिका र किशोरीहरुका लागि सुखद कुरा रहेको जनाउँदै उनले यस्ता अभियानले आत्मविश्वास बढाउने र सशक्तिकरण संगै लैंगिक समानता कायम गर्ने विश्वास व्यक्त गरे । 

प्लान इन्टरनेशनल नेपालका राष्ट्रिय निर्देशक रामकिशनले गल्र्स टेक ओभर अभियान बालिका र किशोरीहरुको समानताका लागि एक उत्कृष्ट अवसर भएको जनाउँदै यसले बालिका तथा किशोरीहरूलाई निर्णायक भूमिकामा राखि उनीहरूको विचार तथा जीवनमा भोगेका चुनौतिका बारेमा जानकारी लिन संघ संस्था र निकायहरूलाई अवसर प्रदान गर्ने बताए ।    

प्लान इन्टरनेशनल नेपाल, पश्चिम क्षेत्रिय कार्यालयका क्षेत्रीय प्रबन्धक मीना पराजुलीले गर्ल्स टेक ओभर जस्ता प्रतीकात्मक अभियानहरूले बालिका र किशोरीहरूको नेतृत्व क्षमता र सहभागितामा जोड दिने जनाउँदै यी अभियानहरूले उनीहरूको सशक्तिकरणलाई प्रोत्साहित गर्ने बताइन् ।  

जुम्ला, कालिकोट, सुर्खेत, धनुषा, सिन्धुली, बर्दिया जिल्लामा अक्टोबर र नोभेम्बर महिनामा यस अभियानअन्तर्गत ब्रिटिश राजदुतावास, नर्वेजियन राजदुतावास, राष्ट्रिय युवा परिषद, फिनल्याण्ड राजदुतावास, यूरोपियन युनियन, जर्मन राजदुतावास, संयुक्त राष्ट्र संघ विकास कार्यक्रम, जर्मन राजदुतावास, गाउँपालिका अध्यक्ष र नगरपालिका प्रमुख, प्रमुख जिल्ला अधिकारी लगायतको भूमिकामा किशोरीहरूले नेतृत्व लिएको क्षेत्रीय प्रबन्धक पराजुलीले बताइन् । 

गल्र्स टेक ओभरमा देशभरका ५ जिल्लाका ३० जना किशोरीहरूले विभिन्न संघसंस्था र निकायहरूमा विभिन्न पदको अर्थपूर्ण र प्रभावकारी तरिकाले नेतृत्व लिने योजना रहेको छ । जिल्ला, प्रदेश, संघीयस्तरमा हुने प्रत्येक पदभार ग्रहणको समयमा किशोरीबाट पदीय जिमेवारीमा रहि किशोरीमाथि लगानी, समावेशितामा आधारित किशोरी लक्षित कार्यक्रम अर्थपूर्ण र प्रभावकारी तरिकाले र किशोरी तथा युवा महिलाको शक्ति र नेतृत्वको बारेमा संस्थाको प्रतिबद्धता रहने र हुनुपर्ने कुरामा छलफल गरिंदै आएको छ । 

गल्र्स टेक ओभर बालिका र किशोरी अधिकारका लागि क्रियाशिल संस्थाहरू, प्लान इन्टरनेशनल नेपाल, युवा, युवालय, क्याड नेपाल–जुम्ला, पेस नेपाल–जुम्ला, किडार्क कालिकोट, हुरण्ेडेक कालिकोट, सादा नेपाल कालिकोट, स्याक नेपाल सुर्खेत, बी–गु्रप बर्दिया, आरकेजेएस बर्दिया, बाँके यूनेस्को क्लब, जनजाती समाज विकास समिति सिन्धुली, जेडब्लुएएस नेपाल, सीएफडब्लुए, एफडि आरसी र सपोर्ट नेपाललगायतका संस्थाहरूको साझा अभियान हो ।