दुर्घटनामा असईको मृत्यु

बर्दिया : मोटरसाइकल दुर्घटनामा परि घाइते भएका सहायक प्रहरी निरीक्षक टोप बहादुर बस्नेतको मृत्यु भएको छ । 

जिल्ला प्रहरी कार्यालय बर्दियामा कार्यरत रहेका बस्नेत बुधवार नेपालगञ्जबाट गुलरिया आउँदै गर्दा गुलरिया नेपालगञ्ज सडकअन्तर्गत हुलाकी राजमार्गमा मोटरसाइकल दुर्घटनामा परि घाइते भएका थिए । 

बस्नेतले चलाएको मोटरसाइकल ट्याक्टरको ट्रलीमा ठोकिएर घाइते भएको र उनलाई उपचारका लागि नेपालगञ्ज लैजाँदै गर्दा बाटोमै मृत्यु भएको जिल्ला प्रहरी कार्यालय बर्दियाका प्रहरी उपरीक्षक केदार खनालले बताए । 

बस्नेत फरार अभियुक्त खोज्ने क्रममा बाँके पुगेको जिल्ला प्रहरी कार्यालय बर्दियाले जनाएको छ ।