पाँच सदस्यीय छानबिन समितिले काम थाल्यो

नेपालगञ्ज : नेपालगञ्ज उपमहानगर पालिका–१२, कोरियनपुरमा शरीरमा आगो लागेर मृत्यु भएकी २२ वर्षीय सिर्जना बुढामगरको घटनाबारे छानबिन गर्न बाँके प्रहरीले गठन गरेको समितिले अनुसन्धान शुरु गरेको । जिल्ला प्रहरी कार्यालय बाँकेका प्रहरी नायब उपरीक्षक दीपक पातलीको नेतृत्वमा गठन गरिएको पाँच सदस्यीय छानबिन समितिले काम थालेको । बाँकेका प्रहरी प्रमुख प्रहरी उपरीक्षक अङ्गुर जिसीका अनुसार समितिले घटनाको सत्यतथ्य र कारणबारे सूक्ष्मरूपमा अनुसन्धान गरेर विस्तृत प्रतिवेदन प्रस्तुत गर्ने छ । 

जिल्ला प्रहरी प्रमुख जिसीले भने, æघटनाको सत्यतथ्य छानबिनका लागि प्रहरी नायब उपरीक्षक पातलीको नेतृत्वमा समिति गठन गरेका छौँ । अनुसन्धानपछि घटनाको यथार्थ कारण खुल्ने छ ।Æ 

प्रहरीका अनुसार शनिबार राति करिब ११ः३५ बजे मगर नेपालगञ्ज नर्सिङ होमपछाडिको क्षेत्रमा जलेको अवस्थामा सडकमा फेला पर्नुभएको थियो । जलेर गम्भीर घाइते उनलाई उपचारका लागि तत्काल भेरी अस्पताल लगिएको थियो । उपचारकै क्रममा चिकित्सकले मगरलाई मृत घोषणा गरेका थिए ।

प्रहरीले मगर विवाहित रहेको र उनको तीन वर्षीय छोरी रहेको जनाएको छ । उनी मोहम्मद आरिफ ढपालीसँग लामो समयदेखि लिभिङ टुगेदरमा बस्दै आएको प्रारम्भिक अनुसन्धानबाट खुलेको प्रहरीले जनाएको छ ।

घटनामा संलग्न भएको आशङ्कामा प्रहरीले ढपालीसहित उनकी आमा र दिदीलाई नियन्त्रणमा लिएर थप अनुसन्धान अघि बढाएको छ । ढपालीलाई भारतको बहराइच र अन्यलाई नेपालगञ्जबाटै पक्राउ गरिएको प्रहरी प्रमुख जिसीले बताए । 

यसैबिच घटनाको विरोधमा नेपालगञ्जमा दैनिक जसो विरोध प्रदर्शन र विरोध सभा हुँदै आएका छन् । घटनाको चौतर्फी निन्दासँगै दोषीलाई कडा कारबाही गर्नुपर्ने माग र दबाब बढ्दै गएको छ । 

सोही क्रममा विभिन्न सङ्घ संस्था र समूहले छुट्टाछुट्टै जिल्ला प्रशासन पुगेर बाँकेका प्रमुख जिल्ला अधिकारी दिलकुमार तामाङलाई ज्ञापनपत्र बुझाउँदै घटनाको निष्पक्ष अनुसन्धान र दोषीलाई कडा सजायको माग गरेका छन् । 

जिल्ला प्रहरी कार्यालय बाँकेका प्रहरी प्रवक्ता प्रहरी नायब उपरीक्षक पातलीले विभिन्न कोणबाट अनुसन्धान भइरहेको जनाउँदै विभिन्न सामाजिक सञ्जालमा समुदायबिच द्वन्द्व फैलाउने खालका टीकाटिप्पणी नगर्न र सञ्चार माध्यमले समेत प्रहरीको सूचना अधिकारीबाट यकिन गरी सूचना सम्प्रेषण गर्न अनुरोध गरेका छन् ।